កណ្ដាល៖ កាលពីវេលាម៉ោង១២និង៣០នាទីរំលងអធ្រាត្រ ឈានចូលថ្ងៃទី១១ ខែមិថុនា ឆ្នាំ២០១៨ យ៉ាងហោចណាស់ ក៏មានបុរសម្នាក់ បានស្លាប់ភ្លាមៗនៅកន្លែងកើតហេតុ និងប្រុសស្រី២នាក់ទៀត រងរបួសធ្ងន់ ត្រូវបានបញ្ជូនទៅសង្គ្រោះនៅមន្ទីរពេទ្យភ្លាមៗ ខណៈពួកគេជិះម៉ូតូលឿនបុកគ្នាពេញទំហឹង ត្រង់ចំណុចមុខផ្សារតាខ្មៅថ្មី តាមបណ្ដោយផ្លូវជាតិលេខ២ ស្ថិតនៅភូមិដើមគរ សង្កាត់ដើមមៀន ក្រុងតាខ្មៅ ខេត្តកណ្តាល។ ជនងគ្រោះ ដែលស្លាប់ឈ្មោះ ឈុន ឈឿន ភេទប្រុស អាយុ៣២ឆ្នាំ ស្នាក់នៅភូមិលៀក ឃុំគោកត្រប់ ស្រុកកណ្តាលស្ទឹង ខេត្តកណ្តាល។
នៅមុនពេលកើតហេតុ គេបានឃើញម៉ូតូម៉ាក ហុងដាឌ្រីម ធុនសេ១២៥ ស៊េរីឆ្នាំ២០១៦ ពណ៌ខ្មៅ ពាក់ស្លាកលេខ ភ្នំពេញ 1GM-0961 បើកបរដោយបុរសម្នាក់ ធ្វើដំណើរតាមបណ្តោយផ្លូវជាតិលេខ២ ក្នុងទិសដៅពីត្បូងទៅជើងទាំងបញ្ច្រាសទិសដៅចរាចរណ៍។ ខណៈមកដល់ដល់ចំណុចកើតហេតុ ស្រាប់តែជ្រុលទៅបុកម៉ូតូមួយគ្រឿងទៀតម៉ាក ហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ កណ្តាល 1X-5989 បើកបរដោយយុវជនម្នាក់ ឌុបយុវតីម្នាក់ទៀត ធ្វើដំណើរពីជើងទៅត្បូងលាន់ដូចរន្ទះ បណ្តាលឲ្យបុរសជាអ្នកជិះម៉ូតូ ហុងដាឌ្រីម ឆ្នាំ២០១៦ បោកក្បាលស្លាប់នៅកន្លែងកើតហេតុ។ ចំណែកភាគីម្ខាងទៀត រងរបួសធ្ងន់ទាំងពីរនាក់។ ជនរងគ្រោះត្រូវបានបញ្ជូនទៅសង្គ្រោះនៅឯមន្ទីរពេទ្យភ្លាមៗ ៕
រូបភាព
Home khmer-news បុរសម្នាក់ បានស្លាប់ភ្លាមៗនៅកន្លែងកើតហេតុ និងប្រុសស្រី២នាក់ទៀត រងរបួសធ្ងន់ ករណីគ្រោះថ្នាក់ចរាចរណ៍